陳易希會考 12 分, 但係就入到科大讀電子工程, 最近俾好多人熱烈 "討論". 話佢只有 12 分, 中英都唔合格, 根本就冇資格上大學云云.

其實又有幾多人真係了解箇中問題係邊度? 答案係香港既教育制度同埋香港既風氣罷了.

究竟乜嘢先係教育? 最基本既就係學懂與人溝通, 擁有基礎知識. 再上一層次就係發掘同專注發揮其所長.

會考高考所考既能力, 多不勝數. 中英文考語文能力, 聽讀講寫為溝通之基本. 數學考應用同邏輯分析. 地理, 物理, 化學, 生物, 歷史, 經濟呢啲都較專門, 考既亦不離應用同分折. 需要同學做既係對科目有深切既了解同消化, 再將其應用於問題上, 亦即考試.

考試制度似乎運作得唔錯. 可惜對考試制度既重視, 亦即係對成績既重視. 成績大過天, 成績好就係一切, 成績唔好就等於失敗! 為咗係考試競爭中勝出, 學生都忘記本身所要學習既能力, 只盲目追求成績. 返學仲唔夠, 仲要上天王補習班. 唔駛真正學到嘢的, 只需要速成, 係考試範圍中就努力讀讀讀, 唔係考試範圍, 讀嚟有乜意思? 學生根本被制度綁死, 跳唔出框框. 能力較強既條路就易行啲, 能力較弱者, 只好俾人標簽為垃圾.

好多香港學生都缺乏創造力. 考試根本就唔駛考呢樣嘢, 要嚟做乜呢? 可見學生並唔係要 "學習" 應有既能力, 只係為咗成績. 如何培養創造力根本唔會俾大多數學生所重視, 原因簡單地只係 "考試唔會考".

另外, 成績又係點真係可以完全反映學生既能力? 其實好多時都唔係. 學生對呢種只為成績, 不斷係考試範圍中死讀既制度感到無奈. 但係佢哋亦逃唔出呢個制度, 最後只好逃避讀書. 有啲學生係有能力的, 只可惜欠缺目標, 欠缺推動力去讀書, 成績根本就唔會好. 亦有好多例子係喺香港讀書讀極都讀唔好, 但係去到外國就成績突飛猛進. 除咗話外國既課程較香港易, 又會唔會真係外國既教學較能令人有推動力, 較能使人有一個適當既目標?

好多人讀好書都係為咗錢, 醫科, 律師, 精算, BBA 等好搵錢既科目就大把人讀, 其他科就無人問津. 當中, 又有幾多個人真係想讀醫讀法津去幫人? 唔係話冇, 只不過好少而已. 興趣同目標根本唔值錢, 邊個會係一個拜金社會中講呢啲嘢?

當然, 如果真係窮到無飯開的話就例外, 除咗努力讀書, 力爭上游之外, 唔通你想佢去銀行打劫咩?

學生只睇到一條路, 不斷係社會同人競爭. 努力讀書, 不斷賺錢, 賺咗錢就有好生活. 更加顯得香港既學生被綁死咗係一個十分單一既思想空間中, 唔識得去發掘新既道路. 不過就算俾佢哋發掘到, 香港呢個社會都未必會接受到呢種新既道路, 反而只會好似陳易希個例子咁, 俾人排擠, 而唔係去包容同豉勵.

一個「多」而「平庸」的世界, 就最能反映出香港教育制度出咗乜嘢差錯. 有一個創新既點子, 就能夠賺錢. 以香港既拜金風氣, 例必將新點子用到最盡, 可見香港人並不笨. 但係累鬥累, 個個都有同一樣嘢, 咁咪要鬥價錢平囉. 只可惜香港人並唔太識得創新, 新點子少之又少. 一方面唔會去精益求精, 另一方面又唔識得創新. 簡單而言, 相同既嘢數量多就多, 但係就好平庸得毫無特色.

好多人只係妒忌陳易希既好運, 會考 12 分但係都可以攞到大學入場券. 當自己比人好, 就一沉百踩; 人哋比自己好, 就好唔抵得, 咪唱衰佢囉. 只會睇到人哋既缺點, 將其無限放大, 盡量將其優點掩沒, 從而自己就可以上位, 呢啲就係香港人係呢個競爭社會力爭上位既方法了. 佢哋根本睇唔到第二條路, 一係就係比人做得好, 如果唔係就逃避, 或者以呢種方式去踩低人抬高自己.

係科大救陳易希出苦海的. 如果唔係, 佢只可以痛苦地接受呢種唔可以好好發展佢才能既考育制度, 當佢讀到冇晒創新靈感既時候, 香港又多一個多一個唔多, 少一個唔少既所謂香港學生了.

唯一可以挑剔就只有佢中英數成績唔好, 連呢啲最基本既嘢都唔識, 你又點同人溝通, 點去發明? 工程就最講求數學應用, 連會考咁易咁數學都只係攞到 D, 大學工程既數學你點應付? 呢樣嘢, 我都認同. 但係如果你要迫死陳易希的話, 放佢係香港既教育制度就好了. 今次有個咁樣既機會, 陳易希佢自己會唔會好好珍惜, 就只有睇佢自己既造化....

相關文章:

是誰「謀殺」了陳易希？

如果我是陳易希

再撐陳易希

朱經武，收得好！